Back to What's on90 sena ilu, fl-20 ta’ Settembru tal-1933 iż-‘Żejtun Band Club’ ġie rreġistrat mal-pulizija. Din l-għaqda hija d-dixxendenti tal-ewwel kumitat fl-irħula tal-Partit tal-Ħaddiema li twaqqaf fiż-Żejtun fl-1922 u wkoll taż-Żejtun Jazz Band imwaqqfa fl-1928. Maż-żmien fil-bidu tas-sena 1930 il-Jazz Band ittrasformat ruħha f’banda li daqqet għall-ewwel darba f’Cine Carabott iż-Żejtun, nhar l-Għid il-Kbir li ħabat fl-20 t’April 1930. Biss id-data uffiċjali tal-fondazzjoni titqies dik meta l-Għaqda ġiet rreġistrata fl-1933.
Maż-żmien il-Banda Żejtun kompliet tikber u twessa’ iżjed il-parteċipazzjoni mużikali tagħha fil-ħajja taż-Żejtun, speċjalment fil-festa ta’ Santa Katerina, fil-purċissjoni tal-Ġimgħa l-Kbira u wkoll fi bliet u rħula oħra.
Kienu bosta s-suċċessi li kisbet fosthom insemmu r-rebħ tal-Konkors Nazzjonali tal-Baned Maltin f’Diċembru tal-1986 b’kunċert Ii sar fit-Teatru Manoel, fil-Karnival ta’ Malta meta waqqfet rekord nazzjonali ta’ rebħ konsekuttiv bil-marċi grotteski, karrijiet u grupp ta’ allegrija. Insemmu wkoll bosta programmi mużikali u magħom il-mawra ricenti f’Lixandra u l-Kajr fl-Egittu fejn tellgħet Programm Mużikali ġewwa l-Katidral ta’ Santa Katarina u programm mużikali fl-okkażjoni tal-ftuħ tal-Ambaxxata Maltija fl-Eġittu.
Id-determinazzjoni tal-kumitati tat-tmexxija wasslet ukoll biex illum l-Għaqda mhux biss għandha każin kbir imma tipposedi wkoll teatru bl-isem Pandora li għal snin twal intuża wkoll bħala ċinema.
Dawn it-tifkiriet fil-kullana ta’ suċċessi se jiġu mfakkra f’dan il-kunċert ċelebrattiv li jinkludi wkoll features. Il-Banda Żejtun se tkun taħt id-direzzjoni tas-Surmast Direttur tagħha Mro David Agius A.(Mus.) L.C.M., A.(MUS) V.C.M. (Hons.) A.L.C.M. F’dan il-kunċert ċelebrattiv se nisimgħu għadd ta’ siltiet fosthom dawk li se jindaqqu għall-ewwel darba tas-Surmastrijiet Maltin bhal Onorato Gauci, Ray Zammit, Antoine Mercieca, John J Pace, u David Agius. Jinkludi wkoll siltiet ta’ diversi kompożituri barranin bħal Bizet, Longfield, Holst, Shostakovic u Dostal.
